அருட்பெருஞ்ஜோதி ஆண்டவர் இடம் மாற்றிக் கொண்டார் !

 *அருட்பெருஞ்ஜோதி இடம் மாற்றிக் கொண்டார்*.!

வள்ளல்பெருமான் பல தெய்வங்களை வணங்கி வழிபாடு செய்து அத்தெய்வங்கள் பெயரால் பல ஆயிரம் பாடல்களை இயற்றியும் பாடியும் வந்துள்ளார்.இறுதியாக *உண்மைக் கடவுள் ஒருவர் உள்ளார்* *அவரே அருட்பெருஞ்ஜோதி ஆண்டவர்* என்பதை தமது அருள் அறிவால் அகத்தில் உள்ள ஆன்ம அறிவின் வழியாக அறிந்து கொள்கிறார்.

அகத்தில் அறிந்த ஆன்மாவின் இயற்கை உண்மை கடவுளின் தன்மையை *இயற்கை உண்மை.இயற்கை விளக்கம்.இயற்கை இன்பம்* என்னும் தகுதியை உடையது என்பதை அறிந்து

அவற்றிற்கு அருட்பெருஞ்ஜோதி ஆண்டவர் என்னும் பெயர் சூட்டுகின்றார். 

அக் கடவுளின்  உண்மையை புறத்தில் காட்ட வேண்டும் என்பதற்காக வடலூர் மக்களிடம்  சுமார் 80 காணி இடம் பெற்று வடலூரில் *சத்திய ஞான சபையை* *18-7-1872 ஆம் ஆண்டு தோற்றுவிக்கின்றார்*

*சத்திய ஞான சபை என்னுள் கண்டனன்*

*சன்மார்க்க சித்தியை நான் பெற்றுக் கொண்டனன்*

*நித்திய ஞான நிறையமு துண்டனன்*

*நிந்தை உலகியற் சந்தையை விண்டனன்* ! அற்புதம் அற்புதமே அருள் அற்புதம் அற்புதமே.என்றும்

*சபை எனது உளம் என தான் அமர்ந்து எனக்கே அபயம் அளித்ததோர் அருட்பெருஞ்ஜோதி!* 

அனுபவத்தை பாடல்கள் வாயிலாக தெரியப்படுத்துகின்றார்.

அருட்பெருஞ்ஜோதி ஆண்டவர் ஆணைப்படி வடலூர் பெருவெளியில் 1871 ஆம் ஆண்டு தொடங்கி 1872 இல்  சத்திய ஞானசபையை பூர்த்தி செய்கின்றார்.

*சத்திய ஞானசபை செயல்பாடுகள் பற்றிய விதிமுறைகளைப் பற்றி சன்மார்க்க அன்பர்களுக்கு தெரியப்படுத்துகின்றார்*.

18-7-1872 ஆம் ஆண்டு  வள்ளலார் வெளியிட்ட *ஞானசபை விளக்க விபவ பத்திரிகை!*

அன்புடைய நம்மவர்களுக்கு வந்தனம் ! 

இன்று தொடங்கி சபைக்கு *சமரச சுத்த சன்மார்க்க சத்திய ஞான சபை என்றும்* சாலைக்கு *சமரச சுத்த சன்மார்க்க சத்திய தருமச்சாலை* என்றும் *சங்கத்திற்கு சமரச சுத்த சன்மார்க்க சத்திய சங்கம்* என்றும் திருப்பெயர் வழங்குதல் வேண்டும்.

*இன்று தொடங்கி அருட்பெருஞ்ஜோதி ஆண்டவரது அருட்பெரும் சித்தி வெளிப்படும் வரைக்கும்* ஞான சபைக்கு உள்ளே தகரக் கண்ணாடி விளக்கு வைத்தல் வேண்டும். 

(மேலே கண்ட வாக்கியத்தை ஊன்றி கவனிக்க வேண்டும். அருட்பெருஞ்ஜோதி ஆண்டவரது அருட்பெரும் சித்தி வெளிப்படும் வரைக்கும் வள்ளலார் சொல்லியவாறு செயல்பட வேண்டும் என்பது பொருள். )

பித்தளை முதலியவற்றால் செய்த குத்துவிளக்கு வேண்டாம். மேலே ஏற்றுகிற குளோப்பு முதலிய விளக்குகளும் வேண்டாம் தகரக் கண்ணாடி விளக்கு வைக்கும் காலத்தில் தகுதியுள்ள நம்மவர்கள் தேகசுத்தி கரணசுத்தி உடையவர்களாய் திரு வாயிற்படிப் புறத்தில் இருந்து கொண்டு விளக்கு ஏற்றி 12 பன்னிரண்டு வயதிற்கு உட்பட்ட சிறுவர் கையில் கொடுத்தாவது. 72 எழுபத்திரண்டு வயதிற்கு மேற்பட்ட பெரியர் கையில் கொடுத்தாவது *உட்புற வாயில்களுக்குச் சமீபங்களில்  வைத்து வரச் செய்வித்தல் வேண்டும்*

 

*நான்கு நாளைக்கு ஒருவிசை* காலையில் மேற்குறித்த சிறியரைக் கொண்டாயினும் பெரியரைக் கொண்டாயினும் உள்ளே தூசு துடைப்பிக்க வேண்டும்.

தூசு துடைப்பிக்க புகும்போது *நீராடி சுத்த தேகத்தோடு கால்களில் வத்திரம் சுற்றிக்கொண்டு புகுந்து முட்டிக்கால் இட்டுக்கொண்டு தூசு துடைப்பிக்கச் செய்விக்க வேண்டும்*. *விளக்கு வைக்கின்ற போதும் இங்கனமே செய்விக்க வேண்டும்*.

விளக்கு வைத்தற்கும் தூசு துடைத்தற்கும் தொடங்குகின்ற 12. பன்னிரண்டு வயதிற்கு உட்பட்ட சிறுவரும்.72.எழுபத்திரண்டு வயதிற்கு மேற்பட்ட பெரியரும் *பொருள். இடம். போகம் முதலியவற்றில் சிறிதும் இச்சை இல்லாதவர்களாய்  தெய்வ நினைப்பு உடையவர்களாய் அன்புடையவர்களாய் இருத்தல் வேண்டும்*.

விளக்கு வைக்கும்போதும் தூசு துடைக்கும்போதும்.

*நம்மவர்களில் நேர்ந்தவர்கள் புறத்தில் நின்று பரிசுத்தராய் மெல்லெனத் துதிசெய்தல் வேண்டும்*.

*யாவரும் யாதொரு காரியம் குறித்தும் தற்காலம் உள்ளே போதல் கூடாது.ஞானசபைத் திறவுகோல் ஒருவர் கையிலும் வெளிப்பட இருக்கப்படாது.*

அத் திறவுகோலை வேறொரு பெட்டிக்குள் வைத்து அப்பெட்டியைப் பூட்டி அப்பெட்டியைப் பொற்சபைக்குள் வைத்து அப்பெட்டித் திறவுகோலை ஆஸ்தான காவல் உத்தரவாதியாய் இருக்கின்றவர் கையில் ஒப்புவித்தல் வேண்டும்.

தொடர்ச்சி காலம் நேர்ந்த தருணம் எழுதுகிறேன்.

இங்கனம்

சிதம்பரம் இராமலிங்கம்.

என்று கையொப்பம் இட்டு  தெரிவிக்கின்றார்..

மேற்குறித்தபடி ஞானசபையில் உட்புற வாயில்களுக்குச் சபீபங்களில் வைத்து வரச் சொன்னாரேத் தவிர.சபையின்  மத்தியில் வைக்க சொல்லவில்லை. 

இந்த செயல்பாடுகள் அருட்பெருஞ்ஜோதி ஆண்டவரது அருட்பெருஞ்ஜோதி சித்தி வெளிப்படும் வரைக்கும் இவ்வாறு செய்து வரவேண்டும் என்று வள்ளலார்  கட்டளை இடுகின்றார்.

*வள்ளலார் சொல்லியப்படி  ஒருவரும்  பின்பற்றவில்லை. கடைபிடிக்கவில்லை. ஆதலால் கோபமாக வெளியில் சொல்லாமல் சத்திய ஞானசபையை பூட்டிக் கொண்டு மேட்டுக்குப்பம் சென்றுவிடுகின்றார்*

வடலூரில் தைப்பூச ஜோதிதரிசனம் வள்ளலார் காட்டவும்இல்லை.

காட்ட சொல்லவும் இல்லை. பின்னாளில்  சமய மதம் சார்ந்த ஆடூர் சபாபதி குருக்கள் அவர்கள் வேட்டவலம் ஜமீன்தார் மற்றும் சில அன்பர்கள் துணைக் கொண்டு.  சுத்த சன்மார்க்க கொள்கைகளுக்கு விரோதமாய் தைப்பூச ஜோதிதரிசனம் காட்டும் பழக்கம் உருவானதாகும்.அது இன்றுவரை தொடர்ந்து நடந்து கொண்டு வருகிறது.

இந்த உண்மைக்கு புறம்பான பழக்க வழக்கங்கள் சுத்த சன்மார்க்கிகளால் அருள் உண்டாகும் காலத்தில்  மாற்றம் உண்டாகும் காலம் வந்தே தீரும்.இது ஆண்டவர் கட்டளை.

*அருட்பெருஞ்ஜோதி ஆண்டவர் தன் விருப்பத்தை மாற்றிக் கொண்டார்*.

அருட்பெருஞ்ஜோதி ஆண்டவர் விருப்பபடி சத்திய ஞானசபைக்குள் வள்ளலார் சென்று அருட்பெருஞ்ஜோதி யுடன் கலந்து இருக்க வேண்டும். 

இதற்கு மேட்டுகுப்பத்தில் சன்மார்க்க  கொடியேற்றி பேருபதேசம் செய்யும் தொடக்கத்திலேயே  கீழ் கண்டவாறு விளக்கம் தருகிறார்.

*இங்குள்ள நீங்கள் எல்லவரும் இதுவரைக்கும் இருந்தது போல் இனியும் வீண்காலம் கழித்துக்கொண் டிராதீர்கள்.*

 *இது முதல் சாலைக்கு ஆண்டவர் போகிற - பத்துத் தினமாகிய கொஞ்சக் காலம் - வரையில், நீங்கள் எல்லவரும் நல்ல விசாரணையில் இருந்து கொண்டிருங்கள்*.

இதனுடைய விளக்கம் என்னவென்றால்.? 

சாலைக்கு போகும் என்பது வடலூர் சத்திய தருமச்சாலை அருகில் உள்ள ஞானசபையை குறிப்பதாகும்.

இதுவும் அருட்பெருஞ்ஜோதி ஆண்டவர் கட்டளை என்று பேருபதேசத்தை நிறைவு செய்கிறார்.

1865 ஆம் ஆண்டு ஷடாந்த சமரச சுத்த சன்மார்க்க சத்திய சங்கம் தொடங்கியது.

23--5--1867 சத்திய தருமச்சாலை தொடங்கியத்.

18-7-1872 ஆம் நாள் ஞானசபை வழிபாட்டு விதி விபரம்  வெளியிட்டது..சங்கம் சாலை சபை பெயர் மாற்றம் செய்த்து.

25-11-1872 ஆம் நாள் சத்திய ஞானசபை விளம்பர பத்திரிகை வெளியிட்டது.

22-10-1873.ஆம் நாள் கொடி ஏற்றி உபதேசம் செய்த்து.

30-1-1874 ஆம் நாள் வெள்ளிக்கிழமை இரவு சித்தி பெற்றது.

*இடையில் நடந்தது என்ன ?*

25-1-1872 ஆம் ஆண்டு சத்திய ஞானசபை முதற்பூசை தொடங்கியதாக திருஅருட்பாவில் எழுதி வைத்துள்ளார்கள்.

(முதற்பூசை என்பது முன்னுக்குபின் முரண்பாடாக உள்ளது. அவற்றைப்பற்றி பிறகு சிந்திப்போம்.)

வள்ளல் பெருமான் பேருபதேசத்தில் சொல்லியவாறு பத்து நாட்கள் கழித்து ஞானசபையில் அருட்பெருஞ்ஜோதி ஆண்டவர் வந்து அமர்ந்து இருக்க வேண்டும். அப்படி எதுவும் நடைபெறவில்லை.

அருட்பெருஞ்ஜோதி ஆண்டவர் வள்ளலார் தங்கி இருக்கும் இடமான மேட்டுகுப்பம் சித்திவளாகத் திருமாளிகையில் வந்து அமர்ந்து கொண்டார்.

*ஞானதீப விளக்கம் என்னும்*

தலைப்பில் 

ஸ்ரீமுக வருடம் கார்த்திகை மாதம் புனர்பூச நட்சத்திரத்தில் உள்ளிருந்த விளக்கைத் திருமாளிகைப் புறத்தில் வைத்து தடைபடாது ஆராதியுங்கள்.

இந்தக் கதவை சார்த்திவிடப் போகிறோம்.இனி கொஞ்சகாலம் எல்லோரும்.ஆண்டவர் இப்போது தீப முன்னிலையில் விளங்குகிறபடியால் உங்களுடைய காலத்தை வீணே கழிக்காமல்.

நினைந்து நினைந்து  என்னும் தொடக்கம் உடைய *ஞானசரியை 28 பாசுரங்கள் அடங்கிய பாடலிற் கண்டபடி* தெய்வப் பாவனையை இந்தத் தீபத்தில் செய்யுங்கள் .

நாம் இப்போது இந்த உடம்பில் இருக்கிறோம் இனி எல்லா உடம்பிலும் புகுந்து கொள்வோம்.

*ஸ்ரீமுக வருடம் தைமாதம் வள்ளலார் திருக்காப்பிட்டுக் கொள்ளும் மரணம் வெளியிட்டவை..*

நாம் உள்ளே பத்துப் பதினைந்து தினம் இருக்கப் போகிறோம். பார்த்து அவநம்பிக்கை அடையாதீர்கள்.ஒருகால் பார்க்க நேர்ந்து பார்த்தால் யாருக்கும் தோன்றாது வெறுவீடாகத்தான் இருக்கும்படி ஆண்டவர் செய்விப்பார்.

என்னைக் காட்டிக்கொடார்.

சுத்த பிரணவ ஞான தேகத்துடன் வெளிப்படுவோம்.

நாம் திருக்கதவை மூடியிருக்கும்கால் அதிகாரிகள் திறக்கும்படி ஆக்ஞாபிக்கின் ஆண்டவர் அருள் செய்வார். என்று அன்பர்களுக்குத்  தெரியப்படுத்துகின்றார்.

மேலும் இதற்கு ஆதாரமான சத்திய அறிவிப்பு என்னும் தலைப்பில் 4 நான்கு பாடல்களை பதிவுசெய்கின்றார்.

1. ஐயன்அருள் வருகின்ற தருணம்இது கண்டீர்

ஐயமிலை ஐயமிலை ஐயன்அடி ஆணை

மெய்யன் எனை ஆட்கொண்ட வித்தகன் சிற் சபையில்

விளங்குகின்ற சித்தன் எலாம் வல்ல ஒரு விமலன்

துய்யன் அருட் பெருஞ்சோதி துரிய நடநாதன்

சுகஅமுதன் என்னுடயை துரைஅமர்ந்திங் கிருக்க

வையமிசைத் திருக்கோயில் அலங்கரிமின் விரைந்தே

மணியாலும் பொன்னாலும் மலராலும் வியந்தே.! 

2. தனித்தலைமைப் பெரும்பதி என் தந்தை வருகின்ற

தருணம் இது சத்தியம்காண் சகதலத்தீர் கேண்மின்

இனித்த நறுங் கனிபோன்றே என்னுளம் தித்திக்க

இன்னமுதம் அளித்தென்னை ஏழுலகும் போற்ற

மனித்தஉடம்பு இதைஅழியா வாய்மை 

உடம்பாக்கி

மன்னிய சித் தெல்லாம் செய் வல்லபமும் கொடுத்தே

கனித்த சிவா னந்தமெனும் பெரும்போகம் தனிலே

களித்திட வைத் திடுகின்ற காலையும் இங்கிதுவே.!

3. சத்தியவான் வார்த்தை இது தான்உரைத்தேன் கண்டாய்

சந்தேகம் இலை இதனில் சந்தோடம் உறுவாய்

இத்தினமே அருட்சோதி எய்துகின்ற தினமாம்

இனிவரும் அத் தினங்கள்எலாம் இன்பம்உறு தினங்கள்

சுத்தசிவ சன்மார்க்கம் துலங்கும் எலா உலகும்

தூய்மைஉறும் நீஉரைத்த சொல் அனைத்தும் பலிக்கும்

செத்தவர்கள் எழுந்துலகில் திரிந்து மகிழ்ந் திருப்பார்

திருவருட்செங் கோல் எங்கும் செல்லுகின்ற தாமே.!

4. என்சாமி எனதுதுரை என்உயிர் 

நாயகனார்

இன்றுவந்து நான்இருக்கும் இடத்தில் அமர் கின்றார்

பின்சாரும் இரண்டரை நா ழிகைக்குள்ளே எனது

பேருடம்பில் கலந்துளத்தே பிரியாமல் இருப்பார்

தன்சாதி உடைய பெருந் தவத்தாலே நான்தான்

சாற்றுகின்றேன் அறிந்திதுதான் சத்தியம் சத்தியமே

மின்சாரும் இடைமடவாய் என்மொழி நின் தனக்கே

வெளியாகும் இரண்டரை 

நாழிகை கடந்த போதே.!

 இத்திருப்பாட்டின் கீழ்  *சத்திய அறிவிப்பு, சத்திய வார்த்தை* என அடிகளால் எழுதப்பெற்றுள்ளது.

 இத்திருப்பாட்டின் கீழ் *இங்ஙனம் எல்லாம் வல்லவர் ஓதுக என்றபடி உரைத்துளேன்* என அடிகளால் எழுதப்பெற்றுள்ளது.

வள்ளல் பெருமான் சத்திய ஞானசபையின் உள் சென்று அருட்பெருஞ்ஜோதி ஆண்டவருடன் கலந்து இருக்க வேண்டியது. வள்ளல்பெருமான் இருக்கும் இடத்திற்கே அருட்பெருஞ்ஜோதி ஆண்டவர் வந்து கலந்து கொண்டது உலகின் பெரிய அதிசயம் அற்புதமாகும்.

*வள்ளலார் பாடல்*! 

ஐயுறேல் இதுநம் ஆணை நம் மகனே

அருள்ஒளித் திருவை நின் தனக்கே

மெய்யுறு மகிழ்வால் மணம்புரி விப்பாம்

விரைந்து இரண் டரைக்கடி கையிலே

கையற வனைத்தும் தவிர்ந்து நீ மிகவும்

களிப்பொடு மங்கலக் கோலம்

வையமும் வானும் புகழ்ந்திடப் புனைக

என்றனர் மன்றிறை யவரே.!

#6-103 ஆறாம் திருமுறை / தலைவி கூறல்

ஐயர் எனக் குள்ளிருந்திங் கறிவித்த வரத்தை

யார்அறிவார் நான்அறிவேன் அவர்அறிவார் அல்லால்

பொய்உலகர் அறிவாரோ புல்லறிவால் பலவே

புகல்கின்றார் அதுகேட்டுப் புந்திமயக் கடையேல்

மெய்யர்எனை ஆளுடையார் வருகின்ற தருணம்

மேவியது மாளிகையை அலங்கரிப்பாய் விரைந்தே

தையல்ஒரு பாலுடைய நடத்திறைவர் ஆணை

சத்தியம்சத் தியம்மாதே சத்தியம் சத்தியமே.!

இந்த உண்மை சம்பவம்  அருட்பெருஞ்ஜோதி ஆண்டவருக்கும் வள்ளல் பெருமானுக்கும் மட்டுமே தெரியும்.வேறு எவருக்கும் தெரியாது இது சத்தியம் என்கிறார்.

எது எப்படியோ வள்ளல் பெருமான் உலகிற்கு போதித்த சுத்த சன்மார்க்க கொள்கையானது.

எல்லாம் வல்ல அருட்பெருஞ்ஜோதி ஆண்டவரைத் தொடர்புகொண்டு அருளைப்பெற்று மரணத்தை வென்று சுத்த பிரணவ ஞானதேகத்தோடு பேரின்ப சித்தி பெருவாழ்வு வாழவேண்டும் என்பதேயாகும்.

எல்லா உயிர்களும் இன்புற்று வாழ்க ! 

கொல்லா நெறியே உலகம் எல்லாம் ஓங்குக !

அன்புடன் ஆன்மநேயன் ஈரோடு கதிர்வேல்..

9865939896.